Siyaasiyiinta Xisbiyada Mucaaradka Somaliya oo ku baaqay in si deg deg ah loo furo wadooyinka xiran ee Magaalada Muqdisho.

Siyaasiyiinta Xisbiyada Mucaaradka Somaliya, ayaa waxay galabta ku baaqeen in si deg deg ah loo furo wadooyinka xiran ee Magaalada Muqdisho.

Siyaasiyiinta oo socod ku soo maray qaar ka mid ah wadooyinka Magaalada Muqdisho, ayaa kolkii dambe shir jaraa’id ku qabtay Taalada Daljirka Daahsoon, waxayna Villa Somalia ugu yeereen in ay furto wadooyinka.

Siyaasiyiintan, ayaa si isu midda u sheegay in dadku isu diyaarinayaan soo dhawaynta Ciidul Adxaa, sidaasi daraadeedna aan loo baahnayn in wadooyinku sii xirnaadaan.

Waxay kaloo sheegeen inaanan lagu marmarsiyoon karin Shirka Madaxda Wadamada Igad, oo Talaadada lagu wado in uu ka furmo Magaalada Muqdisho, sababo ku aadan shirkaasi oo ay sheegeen in uu ka qabsoomayo Garoonka Aadan Cadde.

Madaxweyne Xasan Sheekh Maxamuud oo maanta shir jaraa’id ku qabtay Aqalka Madaxtooyada, ayaa sheegay in wadooyinka loo xiray xaqiijinta ammaanka Caasimadda, iyadoo Caasimadda ay martigelinayso shirka Igad, markii ugu horeysay, sida uu yiri.