Xisbiyo laga diiwaan galiyey Muqdisho
Magaalada Muqdisho, siddeed xisbi-siyaasadeed ayaa si ku-meel-gaar ah loo diiwaangaliyay sida uu sheegay gudgiga doorashooyinka qaranka, ka dib xaflad lagu qabtay hotelka SYL.
Shuruudaha hadda ku xiran in xisbi si ku-meel-gaar ah loo diiwaangaliyo waxaa ka mid ah:
-In la soo qorto codsi shaabbadda xisbiga ay ku dheggan tahay, isla markaana la raaciyo nuqul ka mid ah kulankii ugu horeeyay ee xisbiga.
-In la soo raaciyo xeerka xisbiga iyo habka ay ku xalinayaan haddii dhexdooda uu khilaaf ka yimaado.
-Bixinta lacagta diiwaangalinta oo ah $500.
Hayeeshee Xisbiyada marka sida rasmiga ah loo diiwangalinayo waxa laga rabaa in mid kasta uu la yimaado toban kun oo cod bixiye oo xisbigiisa u diiwan gashan oo gobollo kala duwanna ka soo jeeda, iyo inuu bixiyo lacagta diiwaan galinta oo ah kun Doolar, iyo in ugu yaraantii sagaal gobol uu xarumo ku leeyahay, taageerayaalna u joogaan.
Munaasabaddii maanta sida ku-meel-gaarka ah loogu diiwaan galiyay xisbiyada siddeeda ah waxa ka qayb galay gudoomiyaha golaha shacabka Maxamad Sheekh Cismaan Jawaari iyo ku xigeenka ra’iisul wasaaraha Soomaaliya Mahdi Maxamad Guuleed.