Safiirka Maraykanka u qaabilsan Qaramada Midoobay, Samantha Power, ayaa ku eedeysay Ruushka in uu been ka sheegayo howlgalada uu ka wado Suuriya.
Samantha Power ayaa tilmaamtay in Ruushka uu dagaal buuxa ku qaaday xooggaga mucaaradka ah ee ka dagaallamaya bariga magaalada Xaleb, halkaasi oo laga yaabo in ay ka dhaceen dembiyo dagaal.
Wakiilka Suuriya ee Qaramada Midoobay, Bashar al-Jaafari, ayaa u sheegay golaha ammaanka in dalkiisa uu dagaal kula jiro argagixiso, uuna aakhirkii ka guuleysan doono.
Dhanka kale, weli waxaa sii socota duqeynta lagu hayo deegaannada bari ee Xaleb, halkaasi oo lagu soo warramayo in dad rayid ah ay ku dhinteen.
Xoghayaha guud ee Qaramada Midoobay, Ban ki Moon, ayaa cambaareeyay duqeymaha culus ee ay xukuumadda Suuriya iyo xulafadeeda ku hayaan bariga magaaladaasi.