Shacabka ku dhaqan Koonfurta Gaalkacayo oo maanta dhigay bannaanbax looga soo horjeedo duqayntii askarta Galmudug – SAWIRO

Shacabka ku dhaqan Koonfurta Magaalada Gaalkacyo, ayaa maanta bannaanbax ka dhigay halkaasi, iyadoo ay si wayn uga horyimaadeen weerarka dhinaca cirka ee saakay lala beegsaday Ciidamada Galmudug.

Bannaanbaxayaasha, ayaa taayeero ku gubay wadooyinka, waxayna ka dalbadeen Puntland iyo Mareykankaba inay raaligelin ka bixiyan duqayntaasi.

Cismaan Ciise Nuur (Taardhuleed), Wasiirka Amniga ee Galmudug, ayaa waxba kama jiraan ku tilmaamay in duqayntan lala eegtay kolonyo ay la socdeen dagaal-yahanada Al Shabaab.

Wasiirka oo la hadlay Warbaahinta, ayaa tilmaamay in duqayntaasi lagu dilay ugu yaraan 22 ka mid ah Ciidamada Galmudug, sida uu yiri.

Dhinaca kale askartii ku dhimatay duqayntaasi, ayaa maanta aas loogu sameeyay duleedka Magaalada Gaalkacyo, waxaana ka qaybgalay dadka deegaanka iyo masuuliyiin ka tirsan Galmudug.